mandag 14. desember 2015

Enkel julekunst

I går laga toåringen og eg samarbeidskunst! Det var veldig gøy og så enkelt. Dette er perfekt som julekort eller ramma inn som ei lita gåve.


Eg malte eit enkelt juletre og minsta malte "julekuler" med fingrane.




Vi hadde det veldig kjekt saman, og så var det ein passe kort aktivitet, sånn tidsmessig. Anbefalast!



torsdag 19. november 2015

Adventskalender med meining

Vi har hatt LEGO-kalender, aktivitetskalender (fleire år på rad), sjokoladekalender og fuglekalender (24 fuglar som blir hengt opp i vindauget - familien fekk den av min tyske dagmamma). I år har eg lyst til å kombinere aktivitetskalenderen med noko anna, og dette dukka opp på Pinterest:


I bloggen Thirty Handmade Days kan du lese om ein heilt genial adventskalender. Her set familien seg ned og bestemmer i fellesskap kva organisasjon eller arbeid dei vil gi pengestøtte til. Kvar dag blir det trukke ein pinne med ei velsigning på (t.d. kjøkkenredskap eller toalett eller varme kle eller søsken) og så legg ein ei krone i eit glas eller ein boks for kvar velsigning ein kan telle opp: tre søsken = tre kroner, to toalett i huset = to kroner, 24 kjøkkenreiskaper = 24 kroner i glaset. Til slutt kan ein telle opp alle kronene og overføre i nettbanken eller levere inn pengane dersom det er til eit lokalt arbeid.

Ikkje berre er det flott å tenke gjennom kor heldige vi er og kor godt vi har det og få litt perspektiv på livet, vi kan støtte ein organisasjon og hjelpe andre som ikkje har det like bra som oss, og vi kan øve på matte. 

Ungane har i alle år hatt omvendt adventskalender i barnehagen og på skulen, der alle pakkar inn enten eit plagg som har blitt for lite eller ei leike som ikkje blir brukt. Desse blir levert inn til Norsk Nødhjelp, som sender det vidare til barneheimar i Albania. Vi har gjort dette heime også, som ein del av aktivitetskalenderen. No er det mange menneske på flukt som treng varme kle og kanskje ein liten kosebamse, eller kanskje er det nokon nye i nabolaget ditt som har behov for slikt? Du kan kontakte Frivilligsentralen i kommunen din, eller sjå lista her hos RWTN, eller sjekke med Røde Kors der du bur. 



søndag 8. november 2015

haustkunst

I dag har vi hatt litt kunstverkstad med blad vi har plukka ute, og anna haustkunst.



Vi har lagt papir over lauv og fargelagt med kritt. Vi har teikna blad med vokskritt og malt med vannmaling over og vi har brukt bomullspinnar som malepensel og laga tre i haustfargar.




Vi har vokskritt frå Crayola, dei er gode å teikne med og ikkje for tjukke. Teiknepapiret er frå Søstrene Grene. Vi skulle hatt akvarellpapir til malinga, men det gjekk greitt med lette penselstrøk.




På bomullspinnemaleriet teikna åtteåringen stamme og greiner med kritt og malte på blad med bomullspinnar. Veldig enkelt, og det er skikkelig gøy å male med alternative "penslar".



fredag 30. oktober 2015

Enkle kostymer - fleire idear frå det store internett

Eg har sagt det før, og seier det igjen, eg er fan av å kunne kle seg ut som gøye ting på Halloween - kvifor skal det vere så skummelt?! Her kjem fleire idear til sånn siste-liten-enkle-kostymer! Det er så kjekt å lage sjølv, og det er meir miljøvenleg enn å kjøpe kostymer som kanskje berre blir brukt på Halloween. Kostymene eg linkar til her kan du lage av ting du gjerne allereie har heime, og gjenbruk av stoff er supert! 

Giraffkostyme frå The House That Lars Built - tynn ståltråd/blomstertråd og litt stoff, og kle i passande fargar er alt du treng. Innlegget har fleire kostymer laga på same vis!


Nøtteknekker-maske frå Llevo el invierno. Her treng du ein cornflakes-pakke eller liknande og litt papp. Superkul maske som ingen kjem til å ha maken til!


Her er gjenbruk på sitt beste! Superheltkappe av gammal t-skjorte frå The Southern Institute. Vi har brukt denne oppskrifta til Batmankostyme til mellomsten. Superenkelt!


Gratis masker du kan printe ut på kartong. Halloween-masker frå Mr. Printables. Fest ein strikk bak hovudet, eller lim dei på ein liten pinne og vips! Klar for Halloween!



Lucha Libre-Masker frå Happythought - skriv ut og brett saman. Utfør nokre kule meksikanske bryter-moves og hey presto!


Nydeleg indianerkrone frå Jacks and Kate. Denne kan ein sikkert lage enno enklare med å klippe ut fjær av papir/kartong eller bruke fjær frå hobbybutikk eller hønsegården dersom du har høns i nabolaget.


Eller kva med minimasker av eggekartong? Baby Jungle har laga fire ulike dyrenaser - ta på kle i matchande fargar og så har du eit kjempesøtt kostyme! 


Du finn fleire kostymeidear på Pinterest-tavla mi COSTUME

Siste-liten-kostyme! Ninja!

Ninjago er stort her i huset, og mellomsten vil gjerne vere "den grønne ninjaen" på Halloween. Heldigvis har vi litt grøne kle - så det einaste vi mangla var hette/maske og sverd.

Men internett har løysinga! Og då er det ikkje snakk om nettshopping, men enkle kostymeløysingar!


Du treng ein tynn genser i rett farge. Dersom det er trykk på kan den gjerne vrengast ut-inn (vi gjer det i morgon)


Tre genseren rundt ansiktet
 

Knytt ein litt laus knute bak



Brett halskanten inn mot panna


Brett halskanten inn over nasa


Vri og stram den nederste delen, "snurr" stoffet litt innover og før det bakover mot knuten så det held seg stramt. Dette krev bittelitt øving, men på tredje forsøk sit hette-maska stramt nok. Du kan evt. stramme knuten litt om det trengs.





Pappa er flink med tre og har skore ut eit ninjasverd av finer! Hurra! Du kan også lage i papp (det hadde vi i fjor, riddersverd) 

No gler vi oss maks til morgondagen! 

torsdag 29. oktober 2015

Spindelvevmaleri

Dette var kjempekjekt, ungane storkosa seg med å "trylle fram" spindelvev og lage kule effekter med salt.

Du treng:
Akvarellpapir eller litt tjuke treiknepapir
Kvitt vokskritt
Vannmaling og penslar
Salt (vi brukte Himalayasalt)

Først teiknar du spindelvevmønster med kritt på papiret.
Her har eg teikna med blyant for å vise strekane, til illustrasjon. Det kan vere litt vanskeleg å sjå med kvitt kritt, men i godt lys vil du kunne sjå strekane du har teikna opp.






Så er det berre å slå seg laus med vannmalinga. Hugs å bruke mykje vatn! 





Du kan strø på litt salt her og der i den våte malinga. Saltet trekk til seg vatnet og gir ein kul melert effekt!



Så er det berre å la det tørke før det er klart til å pryde veggen. 

tirsdag 20. oktober 2015

Tur? Nei?

Nokre gongar (eller passe ofte eigentleg), går ikkje ting heilt som planlagt. Har ofte eit mentalt bilete av harmoni som plutseleg ender opp som første korpsøving for miniaspirantar. Harmoni, not so much...

Nysteikte vafler - check!
Nydeleg haustver - check!
Påkledde ungar - check!

Og i det ein skal foreksempel lage ein kaffi å ta med, så fell alt saman og i staden for tur endte vi opp her


På trappa... 



Noko om at målet ikkje er det viktigaste og at vegen er ein del av reisa, eller noko anna svada? Prøv førti centimeter tur...


Men etter mat og drikke og med kaffitermosen i handa kom vi oss faktisk ut. Fem minutt heimafrå er det litt skog og vi såg til og med eit rådyr.


lørdag 17. oktober 2015

Heimelaga kostymer

Eg synes Halloween er så gøy, eg elskar å lage kostymer til ungane - og særleg når dei er så kreative i tankegangen. Dei vil gjerne vere litt artige figurar, og det har ikkje vore spørsmål om zombie eller heks eller vampyr - noko eg synes er heilt flott! Skulle gjerne sett fleire vanlege kostymer på Halloween, og ikkje berre blod og gørr og skumle masker!

Første gong vi gjekk knask eller knep i nabolaget ville mellomsten vere ugle og eldste ville vere einhjørning. Yeah! Filt og stoffrestar og ein gammal hettegenser. Ein hårbøyle som hadde sett sine beste dagar og ei kjegle av papp (det får du på hobbybutikk).





I fjor var eldste ein minion og mellomsten ville vere ridder. Det var lite gult i butikkane, men ein naturfarga ullgenser som uansett kunne trenge litt farge for å leve vidare fekk møte konditorfarge og eddik (sjå her for info om farging av ullplagg), litt gult og svart garn vart ein minion-lue (auget er av papp og litt avkappa dorull) og ein seleshorts frå sommarsesongen - veldig enkelt og greitt!
Ridderen fekk ridderlue (oppskrift i Pickles si bok "Voksne ingen adgang") og brynje av filt. Skjold og sverd av papp (knivbladet på sverdet er dekka av refleksteip - så var han ganske synleg i nattemørket).
Eg kjørte Frida Kahlo, med papirblomster i håret og meksikansk rebozo (sjal) over bringa. Det var veldig gøy å kle seg ut sjølv, så det skal eg fortsette med så lenge ungane vil at eg skal gå knask eller knep med dei!




Skal legge ut bilete av årets kostymer også, når ungane berre får bestemt seg og eg får satt meg ned med symaskina. Akkurat no troner "Ninjago-Lloyd" og "BatGirl" eller "katt" høgt på lista.