Enkel julekunst

I går laga toåringen og eg samarbeidskunst! Det var veldig gøy og så enkelt. Dette er perfekt som julekort eller ramma inn som ei lita gåve.

Eg malte eit enkelt juletre og minsta malte "julekuler" med fingrane.

Vi hadde det veldig kjekt saman, og så var det ein passe kort aktivitet, sånn tidsmessig. Anbefalast!

haustkunst

I dag har vi hatt litt kunstverkstad med blad vi har plukka ute, og anna haustkunst.

Vi har lagt papir over lauv og fargelagt med kritt. Vi har teikna blad med vokskritt og malt med vannmaling over og vi har brukt bomullspinnar som malepensel og laga tre i haustfargar.

Vi har vokskritt frå Crayola, dei er gode å teikne med og ikkje for tjukke. Teiknepapiret er frå Søstrene Grene. Vi skulle hatt akvarellpapir til malinga, men det gjekk greitt med lette penselstrøk.

På bomullspinnemaleriet teikna åtteåringen stamme og greiner med kritt og malte på blad med bomullspinnar. Veldig enkelt, og det er skikkelig gøy å male med alternative "penslar".

Spindelvevmaleri

Dette var kjempekjekt, ungane storkosa seg med å "trylle fram" spindelvev og lage kule effekter med salt.

Du treng:

Akvarellpapir eller litt tjuke treiknepapir

Kvitt vokskritt

Vannmaling og penslar

Salt (vi brukte Himalayasalt)

Først teiknar du spindelvevmønster med kritt på papiret.

Her har eg teikna med blyant for å vise strekane, til illustrasjon. Det kan vere litt vanskeleg å sjå med kvitt kritt, men i godt lys vil du kunne sjå strekane du har teikna opp.

Så er det berre å slå seg laus med vannmalinga. Hugs å bruke mykje vatn! 

Du kan strø på litt salt her og der i den våte malinga. Saltet trekk til seg vatnet og gir ein kul melert effekt!

Så er det berre å la det tørke før det er klart til å pryde veggen. 

Meksikanske gresskar, gresskarlykt DIY

Kanskje nokon som treng litt inspirasjon til gresskarskjæring i år? Det er kjempegøy! Mamma tok forming som ein del av lærarutdanninga, og fann fram sitt gamle stempelkutte-sett som eg fekk overta. Det funka supert til gresskar! Du kjem langt med berre ein litt liten og skikkelig skarp kniv også, det skal gjerne ikkje så mykje til. Det kan vere lurt å streke opp mønsteret med blyant eller tusj før du byrjar skjære, i alle fall dersom du likar at det er litt symmetrisk!

Så er det tid for å hule ut gresskaret. Det gjer du ved å enten skjere ut bunnen eller toppen av gresskaret. Fjern frøa med ei skei og skrap/skjer ut så mykje av fruktkjøtet som du får til (det er enklare å skjere ut lykta dersom veggen ikkje er for tjukk).

Dersom du skal ha levande lys inni må du passe på at det blir nok oksygen, så du må ha litt ordentlege hol i gresskaret. Det kan vere lurt å sette eit telys oppi eit lite glas dersom det er vind ute. Det aller beste er å bruke led-telys (det finn du t.d. på Claes Ohlson), då slepp du tenke på brannfare (eit nykutta gresskar er ikkje så brannfarleg sidan det er fuktig inni, men likevel!) og det lyser fint og jamnt uansett korleis veret er ute!

For å skape ein fin effekt kan du skjere hakk i gresskaret der du ikkje skjer heilt gjennom, då blir det lyst, men ikkje like lyst som der du har skore hol. Det ser også veldig proft ut når gresskaret er tent, og det er ikkje vanskeleg.

I fjor gjekk vi for litt meksikansk stil. Kjøpte eitt stort gresskar til utskjering og så fekk vi nokre små gresskar frå andelslandbruket som vi malte med akrylmaling. Dei vart skikkelig kule og fargerike!

Viss ein vil dra det hakket lengre er det berre å google. Du kan printe ut gratis eller kjøpte instruksjonar og slå deg laus. Hugs berre på at det tek litt tid, så det kan vere lurt å starte kvelden før, ikkje rett før nabolaget ringer på døra for knask eller knep.

Og innhaldet av gresskaret? Her blir ingenting kasta!

Rista gresskarkjerner er til å få vatn i munnen av. Og så kult å lage sin eigen snacks frå grunnen av! Null tilsettingsstoff eller rare E-nummer, og det smakar så godt! HER er ei enkel oppskrift som du kan bruke som basis, og køyre på med krydder eller kvitlauk eller næringsgjær eller kvasomhelst for å lage det meir funky om du vil. Eller gå for naturellversjonen (altså bake/steike dei utan salt) og ha på yoghurt, i rundstykker eller müsli.

Gresskarsuppe er knallgodt (og skikkelig funky farge!) HER er ei deilig oppskrift frå ein av mine favorittmatbloggar Green Bonanza. Berre å bake bitane du har skrapa ut.

Eg har også dampa gresskarkjøtet og kjørt i blender, og hatt i brøddeig og kakerøre. Funkar sikkert bra i smoothies også!

Halloweenfest del 1

Mellomsten ville gjerne ha "Halloween"-bursdag i år. Det er jo kjempegøy å kle seg ut, så vi tente på den. Ungane lagde pynt og invitasjoner, og vi oppfordra til å kle seg ut som det ein ville. Eg synes Halloween er kjempegøy, men det er så masse blod og gørr her i Noreg. I USA er det vanleg at ungane kler seg ut som på karneval, prinsesser og hundar og SuperMario og mjølkekartongar. Her heime er det zombie og skumle masker og vampyrtenner. Det er ikkje så gøy for dei minste!

Vi printa ut invitasjonar frå Mr. Printables (fantastisk nettstad!) https://mrprintables.com/printable-halloween-invitation-bag-o-bones.html

Ungane var på stranda og plukka fine steinar som vi malte i passande fargar. Vi brukte akrylmaling frå Søstrene Grene. Den er god å jobbe med, og ganske grei å vaske av små barnehender etterpå (bør gjere det sånn rett etterpå og ikkje la den få tørke så lenge...)

Gøy at toåringen også kunne vere med!

Det vart også produsert monsterauge! Runde perlebrett og hamaperler. Kjempegøy og superenkelt. Vi la dei ferdige auga på bordet, men det hadde vore kult å henge dei opp også, som ein girlander kanskje?

Bilete frå festen kjem i eit eige innlegg, stay tuned!

Enkel strandmoro

Når ein gløymer å ta med nok bøtter og spader til heile ungeflokken, eller treng ein liten aktivitet på stranda er dette veldig fint! Tippar det er sunt for hjernen også, mønster og fargar! Og litt matematikk er det også, samle og sortere!

Vi samla skjell, steinar i ulike fargar, roseblad og strå. Ein kan lage mandala berre med mønster i sanda også, derdom det ikkje er så mykje å plukke i strandkanten. Eller kanskje drivved og sjøglass kan få ein fin plass?

Berre å bruke fantasien og lage ulike mønster. Kanskje ein kombinasjon av strekar i sanda og ulike plukka-skattar?

Frøbomber!

Vi har planer om å bombe lokalsamfunnet med blomar, ein super forsommarsaktivitet!

Dette treng du til ca. 40 bomber:
Papir (vi brukte rosa papir og avispapir, 20 tynne papirark og eit par sider av lokalavisa)
Vatn
Blomefrø (pass på å bruke blomar som høyrer til i norsk/skandinavisk natur, og helst bievenlege blomar!) Vi brukte 2 pakkar blomstereng, 1 pakke ringblomstfrø og eit par ts honningurt.
Ein stor bolle
Sil/sikt (evt. saftklede)

Vi brukte blomsterengblandingar frå Impecta (den med Nyttoväxter har både eitt- og fleirårige blomar), honningurt og ulike ringblomster (ikkje avbilda).


Riv papiret i småbitar og legg i vatn. Dersom du har ein gamal blender tilgjengeleg kan du lage papirmos i den. Eg ville ikkje øydelegge vår, så eg lot papiret ligge i eit døgn og reiv opp/mosa det med fingrane. Avispapir løyser seg fint opp og er enklare å bruke enn vanleg papir. Dersom du brukar berre avispapir blir frøbombene grå, men det gjer jo ingenting - det kjem ein fargeeksplosjon i etterkant!

Når du har most papiret heller du alt over i ei sikt og klemmer ut mesteparten av vatnet (viss du klemmer ut for mykje blir det vanskeleg å forme bombene, klemmer du ut for lite druknar frøa). Dersom du har laga papirmos i blenderen kan det vere lurt å pakke inn mosen i eit klede og klemme ut vatnet (ein gulpeklut/brettebleie er super til dette!).

Bland så inn frøa med hendene. Det er litt vanskeleg å jobbe med store frø, papirmosen held ikkje særleg godt på dei, vi droppa blomkarsen. Form små ballar (bomber) med hendene. 

Klem ut overflødig vatn og legg til tørk på ei rist med tørkepapir. Tørkepapiret sug til seg væske frå bombene. Dersom tørkepapiret blir vått kan du skifte papir ein gong (er det frø på papiret kan du legge tørkepapiret i blomsterbedet etterpå). La ligge eit par timar/natta over. Fjern tørkepapiret og la dei ligge på rista til dei er tørre (omlag 24-48 timar alt etter kor store dei er).

Kast frøbombene i eigen hage, i vegkanten, på forlatte plassar og vent på blomane! Dei treng nok litt vatn dersom det er tørt. Det kan vere gunstig å gje dei litt starthjelp med ein neve jord rundt, eller å grave dei litt ned i jorda.

Påskeegg del 3

Det har gått i egg i årets påskeverkstader. Huset fullt av egg! Men det er jo så fint, og eit godt symbol på påske. Nytt liv!

I går lagde vi stempla egg. Superenkelt! Eg fann fram akvarellmaling frå Søstrene Grene (og litt akrylmaling frå Panduro, men akvarellmalinga var best - eit lite skrin med små tuber i til finfin pris!), litt papp frå ei pappeske, papptallerknar og kvit kartong (vi brukte tjukke akvarellark, men her kan du jo bruke kva som helst!). Klipp ut eggeformer, skvis maling ut på papptallerknar (veldig greitt med slike tuber med akvarellmaling, vart ein veldig passeleg "strek" til stempla!) og stemple i veg med pappbitar! 

Dette var kjekt for sjuåringen (som laga litt meir avanserte mønster, og brukte pensel på nokre egg), femåringen (som var oppteken av matchande fargar) og snart-toåringen (som berre stempla villt). Enkelt å lage i stand, og kjapt å rydde opp etterpå. Berre rulla alt (vel, ikkje måling, penslar og ferdige egg sjølvsagt) inn i papirduken og rett i papirsøpla!

Påskeegg med glassmalerieffekt

Etter å ha grilla pølser og grove kanelpinnar (grov pinnebrøddeig snurra rundt grillpinnen, med litt kanel og rørsukker på) ute i dag vart det inneaktivitet etterpå. Vi har laga påskeegg i dag også, pinspirert av Things to Share and Remember. Kan gjerast superenkelt for småttisar og større barn kan gjere seg så mykje flid dei berre vil. Paljettar er ein sikker vinnar i alle aldersgrupper dog!

Du treng: kartong i valfri farge, kontaktpapir, silkepapir og evt. paljettar. Synål og sytråd til oppheng viss du ikkje vil klistre dei rett på vindauget.

Klipp ut eit stort egg av kartong (kan teikne det først med blyant om du ikkje vil klippe på frihand. Anbefaler at ein vaksen hjelp til eller utfører dette!), klipp ut eit mindre egg inni det store egget slik at du får ei ramme. Dersom du startar med eit skikkelig stort egg får du minst to glassmaleriegg av det same egget! Legg egget på kontaktpapiret og klipp ut ein firkant som er stor nok til å dekke egget. Fjern den kvite plasten og lim egget på (det hjelp å ha litt lange negler, det er innmari vanskeleg å dele plast og kontaktpapir! Grr!)

Riv opp små bitar silkepapir og klistre på inni egget. Kjør på med paljettar om du har! Større barn vil kanskje klippe ut former med saks og lime på, eller lage mønster av striper/sikksakk. Her er det berre å la kreativiteten boble over. Berre pass på at det ikkje er for mykje silkepapir langs eggeramma, då sit ikkje kontaktpapiret du skal ha på toppen så godt fast.

Klipp ut ein ny firkant med kontaktpapir og legg over, slik at silkepapiret og eggeramma har plast på begge sider. Klipp av overflødig kontaktpapir og voila! Heng opp i vindauget og nyt dei vakre fargane! Eg har hengt dei på ei grein frå epletreet i hagen.