Spindelvevmaleri

Dette var kjempekjekt, ungane storkosa seg med å "trylle fram" spindelvev og lage kule effekter med salt.

Du treng:

Akvarellpapir eller litt tjuke treiknepapir

Kvitt vokskritt

Vannmaling og penslar

Salt (vi brukte Himalayasalt)

Først teiknar du spindelvevmønster med kritt på papiret.

Her har eg teikna med blyant for å vise strekane, til illustrasjon. Det kan vere litt vanskeleg å sjå med kvitt kritt, men i godt lys vil du kunne sjå strekane du har teikna opp.

Så er det berre å slå seg laus med vannmalinga. Hugs å bruke mykje vatn! 

Du kan strø på litt salt her og der i den våte malinga. Saltet trekk til seg vatnet og gir ein kul melert effekt!

Så er det berre å la det tørke før det er klart til å pryde veggen. 

Tur? Nei?

Nokre gongar (eller passe ofte eigentleg), går ikkje ting heilt som planlagt. Har ofte eit mentalt bilete av harmoni som plutseleg ender opp som første korpsøving for miniaspirantar. Harmoni, not so much...

Nysteikte vafler - check!

Nydeleg haustver - check!

Påkledde ungar - check!

Og i det ein skal foreksempel lage ein kaffi å ta med, så fell alt saman og i staden for tur endte vi opp her

På trappa... 

Noko om at målet ikkje er det viktigaste og at vegen er ein del av reisa, eller noko anna svada? Prøv førti centimeter tur...

Men etter mat og drikke og med kaffitermosen i handa kom vi oss faktisk ut. Fem minutt heimafrå er det litt skog og vi såg til og med eit rådyr.

Heimelaga kostymer

Eg synes Halloween er så gøy, eg elskar å lage kostymer til ungane - og særleg når dei er så kreative i tankegangen. Dei vil gjerne vere litt artige figurar, og det har ikkje vore spørsmål om zombie eller heks eller vampyr - noko eg synes er heilt flott! Skulle gjerne sett fleire vanlege kostymer på Halloween, og ikkje berre blod og gørr og skumle masker!

Første gong vi gjekk knask eller knep i nabolaget ville mellomsten vere ugle og eldste ville vere einhjørning. Yeah! Filt og stoffrestar og ein gammal hettegenser. Ein hårbøyle som hadde sett sine beste dagar og ei kjegle av papp (det får du på hobbybutikk).

I fjor var eldste ein minion og mellomsten ville vere ridder. Det var lite gult i butikkane, men ein naturfarga ullgenser som uansett kunne trenge litt farge for å leve vidare fekk møte konditorfarge og eddik (sjå her for info om farging av ullplagg), litt gult og svart garn vart ein minion-lue (auget er av papp og litt avkappa dorull) og ein seleshorts frå sommarsesongen - veldig enkelt og greitt!

Ridderen fekk ridderlue (oppskrift i Pickles si bok "Voksne ingen adgang") og brynje av filt. Skjold og sverd av papp (knivbladet på sverdet er dekka av refleksteip - så var han ganske synleg i nattemørket).

Eg kjørte Frida Kahlo, med papirblomster i håret og meksikansk rebozo (sjal) over bringa. Det var veldig gøy å kle seg ut sjølv, så det skal eg fortsette med så lenge ungane vil at eg skal gå knask eller knep med dei!

Skal legge ut bilete av årets kostymer også, når ungane berre får bestemt seg og eg får satt meg ned med symaskina. Akkurat no troner "Ninjago-Lloyd" og "BatGirl" eller "katt" høgt på lista.

Halloweenfest del 2

11 gutar, ganske stor prosentandel i Spidermankostyme, hadde ein flott Halloweenfest. Vi hadde planlagt ei hinderløype ute med pappkopp-kanon, diger slangeparadis, edderkoppnett, kast-på-boks og ein slimsjø (teikna med kritt), popcorn og pølser, kake, spindelmuffins og gele. Veldig enkelt og skikkelig gøy!

Laga eit digert edderkoppnett av svart garn, og festa små bjeller på - ringte det i bjella var det ut av nettet og prøve på nytt. Alle klarte å kome seg over til den andre sida på første eller andre forsøk (det var relativt mykje enklare utan superheltkapper som hang ned bak og øydela til tross for høge kneløft!)

Malte hermetikkbokser i passande fargar. Akrylmaling altså - det funkar til alt! Erteposane fekk ein av ungane i julegåve av ei venninne ein gong, dei har blitt mykje brukt til både sjonglering og bokskast og kast på blink. Veldig stas! Tennisballar eller liknande funkar også gull til kast på boks, men fordelen med erteposar er at dei blir liggande og ikkje triller avgårde. Gjer jobben til den som skal sette på plass boksane og hente kastereiskap litt enklare. Kast på boks er også overraskande populært, så det vart mange runder på denne posten.

Den digre slangen har skummelt skinn, dei raude kryssa er nemleg GIFTIGE! Det betyr at ein ikkje kjem seg vidare i paradisen før alle har kasta og det vart ganske trangt til slutt. Hadde sånne store terningar som heng i bilspeglar i litt harry bilar (litt usikker på kor dei terningane kom frå, trur kaaanskje dei var premie på tivoli eller noko slikt ein gong i tida), men det går jo også an med småstein og å øve på å kaste treffsikkert! Eg har også sett store terningar på Søstrene Grene og TGR tidlegare, kanskje leikebutikken også har. Supert til å leike paradis, eller digert stigespel, med innandørs om vinteren.

Spindelvevmuffins (superenkelt, sjå her), monsterbrownies med tusen auge (auga er lag av melisglasur, sjå her, men hugs at dei må tørke eit par dagar før bruk!), gresskargelé (aka appelsingelé) og monstergugge (aka sjokoladepudding).

Enkel bordpynt med dei kule monster-gresskar-spøkelsessteinane ungane laga, monsterauge av perler og papirgresskar frå Søstrene Grene. Serviettane er også derfrå. Plastedderkoppane kjøpte eg på ebay, men det får ein sikkert tak i over alt i leikebutikkar no i oktober! 

Meksikanske gresskar, gresskarlykt DIY

Kanskje nokon som treng litt inspirasjon til gresskarskjæring i år? Det er kjempegøy! Mamma tok forming som ein del av lærarutdanninga, og fann fram sitt gamle stempelkutte-sett som eg fekk overta. Det funka supert til gresskar! Du kjem langt med berre ein litt liten og skikkelig skarp kniv også, det skal gjerne ikkje så mykje til. Det kan vere lurt å streke opp mønsteret med blyant eller tusj før du byrjar skjære, i alle fall dersom du likar at det er litt symmetrisk!

Så er det tid for å hule ut gresskaret. Det gjer du ved å enten skjere ut bunnen eller toppen av gresskaret. Fjern frøa med ei skei og skrap/skjer ut så mykje av fruktkjøtet som du får til (det er enklare å skjere ut lykta dersom veggen ikkje er for tjukk).

Dersom du skal ha levande lys inni må du passe på at det blir nok oksygen, så du må ha litt ordentlege hol i gresskaret. Det kan vere lurt å sette eit telys oppi eit lite glas dersom det er vind ute. Det aller beste er å bruke led-telys (det finn du t.d. på Claes Ohlson), då slepp du tenke på brannfare (eit nykutta gresskar er ikkje så brannfarleg sidan det er fuktig inni, men likevel!) og det lyser fint og jamnt uansett korleis veret er ute!

For å skape ein fin effekt kan du skjere hakk i gresskaret der du ikkje skjer heilt gjennom, då blir det lyst, men ikkje like lyst som der du har skore hol. Det ser også veldig proft ut når gresskaret er tent, og det er ikkje vanskeleg.

I fjor gjekk vi for litt meksikansk stil. Kjøpte eitt stort gresskar til utskjering og så fekk vi nokre små gresskar frå andelslandbruket som vi malte med akrylmaling. Dei vart skikkelig kule og fargerike!

Viss ein vil dra det hakket lengre er det berre å google. Du kan printe ut gratis eller kjøpte instruksjonar og slå deg laus. Hugs berre på at det tek litt tid, så det kan vere lurt å starte kvelden før, ikkje rett før nabolaget ringer på døra for knask eller knep.

Og innhaldet av gresskaret? Her blir ingenting kasta!

Rista gresskarkjerner er til å få vatn i munnen av. Og så kult å lage sin eigen snacks frå grunnen av! Null tilsettingsstoff eller rare E-nummer, og det smakar så godt! HER er ei enkel oppskrift som du kan bruke som basis, og køyre på med krydder eller kvitlauk eller næringsgjær eller kvasomhelst for å lage det meir funky om du vil. Eller gå for naturellversjonen (altså bake/steike dei utan salt) og ha på yoghurt, i rundstykker eller müsli.

Gresskarsuppe er knallgodt (og skikkelig funky farge!) HER er ei deilig oppskrift frå ein av mine favorittmatbloggar Green Bonanza. Berre å bake bitane du har skrapa ut.

Eg har også dampa gresskarkjøtet og kjørt i blender, og hatt i brøddeig og kakerøre. Funkar sikkert bra i smoothies også!

Halloweenfest del 1

Mellomsten ville gjerne ha "Halloween"-bursdag i år. Det er jo kjempegøy å kle seg ut, så vi tente på den. Ungane lagde pynt og invitasjoner, og vi oppfordra til å kle seg ut som det ein ville. Eg synes Halloween er kjempegøy, men det er så masse blod og gørr her i Noreg. I USA er det vanleg at ungane kler seg ut som på karneval, prinsesser og hundar og SuperMario og mjølkekartongar. Her heime er det zombie og skumle masker og vampyrtenner. Det er ikkje så gøy for dei minste!

Vi printa ut invitasjonar frå Mr. Printables (fantastisk nettstad!) https://mrprintables.com/printable-halloween-invitation-bag-o-bones.html

Ungane var på stranda og plukka fine steinar som vi malte i passande fargar. Vi brukte akrylmaling frå Søstrene Grene. Den er god å jobbe med, og ganske grei å vaske av små barnehender etterpå (bør gjere det sånn rett etterpå og ikkje la den få tørke så lenge...)

Gøy at toåringen også kunne vere med!

Det vart også produsert monsterauge! Runde perlebrett og hamaperler. Kjempegøy og superenkelt. Vi la dei ferdige auga på bordet, men det hadde vore kult å henge dei opp også, som ein girlander kanskje?

Bilete frå festen kjem i eit eige innlegg, stay tuned!

Enkel strandmoro

Når ein gløymer å ta med nok bøtter og spader til heile ungeflokken, eller treng ein liten aktivitet på stranda er dette veldig fint! Tippar det er sunt for hjernen også, mønster og fargar! Og litt matematikk er det også, samle og sortere!

Vi samla skjell, steinar i ulike fargar, roseblad og strå. Ein kan lage mandala berre med mønster i sanda også, derdom det ikkje er så mykje å plukke i strandkanten. Eller kanskje drivved og sjøglass kan få ein fin plass?

Berre å bruke fantasien og lage ulike mønster. Kanskje ein kombinasjon av strekar i sanda og ulike plukka-skattar?